يوميات مريض نفسي: “أنا جيت الدنيا دي أصلا ضيف”

الكاتب: مريض نفسي

أنا بردان جدّا من خوفي

برعش واتلوّى فـ عزّ الصّيف

أنا جاي الدّنيا دي أصلا ضيف

وماليش فـ حياتكم أي مكان

يمكن تعبان

من كوني ضعيف

بترقص على حبل الدّنيا

كما ميّت يتنفّس تخاطيف

يرجع دنياه بس ثواني

يرحل تاني ويصبح اسمه

متدوّن فـ دفاتر أرشيف

مكتوب قدامه فـ وصف بسيط

“كان قلبه نظيف”

***

أنا بردان جدّا رغم الشمسة

اللّي بترمي فـ قلبي سهامها

رغم الحنّيةفـ قلب أمي

رغم اللّهفة وخوفها عليّا

رغم اللي أساسا ما عرفتوش

عن حبّ أبويا وصوت جدي

ومرض جدّتي لمّا شافتني

بتلوّى فـ بردي ف عزّ الصّيف

مالت على أمّي بصوت مكسور

ابنك فـ الدنيا دي أصلا ضيف

حاجي على الأيّام الباقية

شيلي هدومه الصّيفي خفيفة

وارقيه

طبطبي على قلبه

واعرفي سرّه

وبلاش تنسيه

وسط طبيخك أو خوفك من درجات هتضيع

وسيبيه يفتح صدره لدنياه.. لو حتي يصيع

اضمني إنّه هيرجع يبكي

على صدرك لمّا يتألّم

يرمي حمول الدنيا عليكِ

يحكي لك قصّته م الأوّل

ما تملّيش بس من الحكايات

ابنك مجروح من قبل ما تتوجد الدنيا

من قبل ما يعرف معنى الجرح

النّظرة ف عينه بتستفسر

والكلمة هتحتاج مليون شرح

ضمّيه بحنان أبيض صافي

عوّضي صقعة قلبه البردان

بكلام دافي

وبلاش تنسيه وسط التّخاريف

تسيبيه يتلوّى ف عزّ الصيف

أنا بردان جدّا من خوفي

أنا جيت الدّنيا دي أصلا .. ضيف

تعليقات الفيسبوك

التعليقات

عن الكاتب

مريض نفسي

اضف تعليق

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

نشر..